Menu

La formación reivindica la necesidá de destinar fondos a polítiques sociales, llucha contra'l desemplegu y pal asturianu

Izquierda Xunida pidió güei xestos na primer xunta col Gobiernu pa encetar los presupuestos de 2018. La derogación de la reforma del impuestu de sucesiones, esplicó'l coordinador xeneral, Ramón Argüelles, podría ser un bon entamu pa llegar a alcuerdos empobinaos a llograr unes cuentes progresistes y sociales. Hai disposición para llegar un alcuerdu, pero, esclarió'l máximu responsable d'IX, siempres que sían unes cuentes claramente d'izquierdes.

Dar atrás cola reforma del impuestu de sucesiones apautada nel so día por PSOE y PP, aportunó Argüelles, sería un bon xestu que dexaría recuperar 40 millones d'euros n'ingresos, impresicindibles pa ameyorar les polítiques d'acción social. L'oxetivu pa IX ye evitar que se pierdan otros dos años de llexislatura.

Lo ideal, según Argüelles, sería llograr un alcuerdu ampliu sofitáu non solo pol partíu socialista y por Izquierda Xunida. N'ese sentíu, Argüelles esplicó que van tratar de que se sume Podemos, con quien van caltener nueva xuntes empobinaes a llegar a consensos pola izquierda.

El voceru d'IX na Xunta Xeneral del Principáu, Gaspar Llamazares, enfatizó en que'l presupuestu tien qu'ufiertar financiamientu abondu pa polítiques sociales. Amás, señaló la importancia de dotar presupuestariamente polítiques de dignificación de la llingua asturiana, no que denominó, " camín pa escontra la oficialidá".

En materia d'ingresos y fiscalidá, Gaspar Llamazares apostó por esquizar impuestos a les bébores azucaraes como yá se fixo n'otros llugares y tamién impuestos medioambientales empobinaos non tantu a la recaldación, la protección de la redolada.

Esta foi la primer xunta col Gobiernu de cara a la negociación de los presupuestos 2018. Nes próximes selmanes IX tamién pretende reactivar les conversaciones con Podemos por que dambes fuerces puedan llegar a alcuerdos que puedan vese depués reflexaos nes cuentes del próximu añu, daqué posible, esplicó Argüelles, si se llogra sumar los 14 diputaos d'IX y la formación morada a los otrs 14 del PSOE.

Nesta primer xunta, xuntu al coordinador y el voceru parlamentariu, tamién participaron per parte d'IX, el so secretariu d'Organización, Alejandro Suárez, y la diputada Concha Masa