Menu

Pala formación ye indispensable una investigación a xeitu de lo asocedío y planes d'auto protección que dexen la más rápida respuesta.

Argüelles y Miranda amuesen la so solidaridá coles persones afectaes y la so reconocencia a los equipos d'estinción para los que piden más medios.

Izquierda Xunida reclamó güei polítiques actives y cola abonda dotación presupuestaría para prevenir les quemes. El coordinador xeneral d’IX Asturies, Ramón Argüelles, y la vicepresidenta primera de la Xunta Xeneral del Principáu, María José Miranda, visitaron güei zones afectaes en Cangas de Narcea y Degaña, onde llamentaron los daños humanos y materiales de lo que calificaron como d'auténtica catástrofe.

"Tenemos que faer cierta autocrítica" señaló Argüelles pa quien la nueva situación del campu asturiano, con menos población y una cabana ganadera menor en montes y zones forestales espliquen tamién la situación d'abandonu na que s'atopen grandes estensiones del territoriu y que favorecen les quemes. "Nun podemos distrayenos y sustraer ayudes como se fixo dalgún añu para les ayudes anti quemes". Nesti sentíu referíase a la “perda d'inversión pública en faxes forestales" de gran utilidá pa evitar que les quemes estiéndanse. Asina mesmo, señaló la importancia d'ayudes a los conceyos para ordenar la masa forestal, la llimpieza y operaciones que dexen amenorgar los riesgos.

Ramón Argüelles plantegó amás la necesidá de poner en marcha planes d'auto protección: "tantu los conceyos como residencies o zones residenciales que tean barganal de los montes tendríen de tener unos planes d'auto protección por que, nun casu como esti, los medios puean movilizase. Y eso ye responsabilidá del Principáu d'Asturies y tendríamos de trabayar nesa dirección".

Sía que non, el coordinador xeneral d’IX Asturies fixo fincapié nel bon llabor de los equipos d'estinción, tanto profesionales como voluntarios. "Colos medios que se tenía creo que'l llabor de los Bomberos d'Asturies foi exemplar, pero eso nun nos puede autocomplacer tampoco. Hai places nesa plantiya que nun se cubrir y hai que cubrir por que en situaciones como esta la respuesta sía entá más rápida".

Argüelles pidió tamién más coordinación informativa de cara aselar a la población. Y ye que, nes primeres hores esa tresmisión d'información nun foi, al so xuiciu, la necesaria. Asina, señaló que dende protección civil sacóse pela mañana un comunicáu aconseyando que la población nun saliera de les cases pa, menos de quince minutos dempués, el Principáu, al traviés de Salú Pública emitir otru en sentíu contrariu, nuna operación que llueñe d'aselar a la población llogra ponela más nerviosa. "En situaciones d'emerxencia tenemos qu'aselar al personal y comunicar solo lo puramente necesario".

María José Miranda quixo manifestar la solidaridá del grupu parlamentariu d'IX con toles persones afectaes. "Nun ye momentu de reproches nin de buscar culpables nin responsables, porque tamos inda na fase de dar salida a les xentes de la zona y d'escastar d'una vegada por toles quemes pero sí queremos faer fincapié, y yá llevamos tiempu reivindicándolo, en que nel triángulu del fueu hai trés elementos: combustible, l'osíxenu y l'activación. Contra la condición humana nun podemos actuar pero sí que tenemos de faelo, como alministraciones nel elementu del combustible". Nesti sentíu, la vicepresidenta primera de la Xunta enfatizó la necesidá d'una política forestal eficiente y eficaz, con repoblaciones ordenaes, evitando la continuidá de les coníferes que faen bien difícil escastar los fueos como yá asocedió en Ibias.