Menu

La señal de la TPA va volver antes del fin d'añu La coalición denuncia los múltiples problemes de la recepción de la TDT na comunidá

Ovidio Zapico, diputáu d'IX d'Asturies, reprochó esta mañana al Director d'Industria y Telecomunicaciones los más d'once meses que lleven casi 3.000 asturianos ensin ver la TPA pol retrasu nes xestiones pa licitar un contratu, una cuestión que'l responsable d'Infraestructures del grupu parlamentariu esixe que nun se vuelva a repitir. Manuel Monterrey Meana, Director de Telecomunicaciones, aseguró güei na interpelación reclamada por IX qu'antes de fin d'añu la empresa Abertis volverá ufiertar la señal de la TPA a los más de 1.700 llares que lleven meses denunciando l'ausencia d'un serviciu públicu qu'IX considera vertebrador del territoriu. L'axudicación a Abertis, por 762.000 euros, producióse esta selmana y según el Director podría faese cargu del serviciu antes de lo que marca'l pliegu de condiciones pa volver tener cobertoria del 100% de la TPA n'Asturies. “Ye inadmitible la demoranza pa emprestar esti serviciu”, denunció'l diputáu d'IX.

Zapico sorrayó tamién la poca inversión nos centros propios del Principáu frente a los compartíos colos d'esta empresa, Abertis. De la mesma esixó la ellaboración de pliegos neutros pa los centros reemisores de la señal.

El diputáu d'IX tamién suxurió al Gobiernu qu'estudien la posibilidá de qu'haya un teleoperador de telecomunicaciones pa xestionar la TDT de manera más eficaz de lo que ye agora, cuidandoo que les quexes nun son solo pol apagón de la TPA. “Son munchos los problemes en redol a la recepción de la TDT n'Asturies”, alvirtió Zapico coles mesmes qu'esixó que nesti mandatu corrixan les ineficiencies ya ineficacies pa tener una cobertoria total independientemente del llugar de residencia.