Menu

La moción subsiguiente d'IX ta basada en que se convierta nun centru de reinserción

El Parlamentu asturianu demandó güei un nuevu modelu de xestión interna pal centru de Menores de Sograndio, modificando los sistemes y protocolos de seguridá pa embrivir les actuaciones coactives basaes nel usu de la fuerza y la potenciación de la formación del personal, ente otres cuestiones. La moción escuerre tamién que'l Gobiernu revise'l proyectu del centru, de manera que se convierta nun auténticu centru de reinserción alloñáu de práctiques más propies de les instituciones carcelaries, na llínea de alcordar nel senu de la Xunta Xeneral. Too ello produzse dempués de que la Comisión Europea, al traviés de la Comisión Antitortura del Conseyu d'Europa denunciara malos tratos nesti centru asturianu.

La moción subsiguiente d'IX, con una enmienda de Ciudadanos, -que foi aceptada n'ares del consensu ente los grupos- demanda al executivu asturianu qu'atendiendo a la resultancia de la investigación abierta por parte de la Fiscalía, y nel casu de que la mesma derívase una declaración xudicial d'investigáu escontra dalgún de los responsables del Centru, va refiertar la xestión del actual Director del Centru de Menores del Principáu d'Asturies en Sograndio, y va encamentar al Conseyu de Gobiernu a cesalu y sustituyilu por una persona con un perfil acorde a una nueva etapa nel centru, na que se desenvuelva un modelu dafechu distintu de xestión. Esti últimu puntu mentáu cuntó col votu en contra del PSOE y Foro Asturies.

El testu aprobáu esta mañana, que foi votáu por puntos, esixe al Gobiernu revisar el proyectu del centru de manera que se convierta nun auténticu centru de reinserción, alloñáu de práctiques más propies de les instituciones carcelaries, na llínea de alcordar nel senu de la Xunta Xeneral. El grupu parlamentariu del PSOE foi l'únicu que refugó esti puntu en defensa del Gobiernu.

Na so intervención, la diputada d'IX Concha Masa dexó clares trés cuestiones previes: el valor del centru de menores de Sograndio, la reconocencia al gran llabor de los trabayadores y les posibilidaes de meyora qu'esisten. Per otru llau, tamién sorrayó que la propuesta d'IX ye de tipu constructivu y realizada de forma positiva.