Menu

El voceru d'IX critica que se pervierta la contabilidá analítica al utilizala para disuadir a los pacientes del usu del sistema en cuenta de empobinala a ameyorar la calidá del serviciu.

El voceru d'IX na Xunta Xeneral del Principáu, Gaspar Llamazares, reprochó güei al Gobiernu d'Asturies l’escurrimientu de la “factura solombra” de los servicios sanitarios yá que, aseguró, tratase de ”mercancía averiada”, sacada del “bagul de les alcordances” y ye inoperante. Ello ye que afirmó'l parllamentariu, l'oxetivu nun ye ameyorar el sistema sinón despintar el furacu negru de la política sanitaria n'Asturies: nun hai, realmente, una orientación de política sanitaria”. Pal diputáu llama l'atención la so inoportunidad yá que, esplicó, “realízase nel momentu qu’hai mayor demanda pola epidemia de gripe. ¿Qué ye lo que puede concluyir un ciudadanu? Pos que se-y castiga porque utiliza mal los sistemes sanitarios”.

La Conseyería de Sanidá, reprochó'l parllamentariu, va al debalu, ensin conocese nin escontra onde va nin cuáles son les sos prioridaes a pesar de que, recordó, dalgunos de les exes que tendríen de marcar la so xestión yá se conteníen nel Pactu de Investidura. Orientación a crónicos, refuerzu de l'Atención Primaria y Salú Pública, meyora de la Salú Mental yeren dalgunes d'eses directrices que, sicasí, siguen pindies.

Frete a factures per serviciu, Gaspar Llamazares preguntóse ónde ta'l decretu sobro llistes d'espera, que yá lleva más d'un añu ensin facer; ónde ta'l plan de salú mental, del que nada conozse; ónde ta la llei de salú, de la que se desconocen conteníos y principios xenerales; y, sobremanera, qué se fixo del anunciu del Gobiernu y del mandatu de la Xunta Xeneral al respective pa integrar el conxuntu de l'Atención y p'actualizar y revitalizar l'Atención Primaria.

Al respective de la inutilidá, Llamazares recordó que yá en 2010 hubo una orde ministerial pa la implantación d'esa factura solombra, afigurada na so implementación parcial n'Andalucía y Valencia y, en dellos hospitales de Madrid, magar nésta última comunidá acaba de ser desaniciada. “Ye una midida residual nel Sistema Nacional de Salú. Si aspiramos a un Sistema Nacional de Salú que formule y que funcione coherentemente habría que dicir qu'esta midida, en tal casu, habría que compartila a nivel del conseyu Interterritorial de Salú: nun ye asina, ye un escurrimientu de la Conseyería”.

Pal parllamentariu, teniendo en cuenta que los tratamientos son decidíos pol mesmu sistema, escarez d'utilidá una midida d'esti tipu, siquier dende la perspectiva de la eficacia y la eficiencia. “Poca utilidá tien la conocencia del preciu per parte del paciente cuando'l paciente nun tien capacidá pa decidir sobro la orientación y la demanda”.

Amás de la falta d'utilidá, Llamazares señaló qu'esta media tresllada una visión “falsa” del sistema sanitariu que, enfatizó, “nun ye un sistema comercial, nun ye una gran superficie, onde esista ufierta y demanda y ónde ésta regule'l preciu, sinón que ye un sistema públicu onde esiste un paciente y unes prestaciones”.

Frente a una factura na que se-y diga a la ciudadanía lo caro que sal atendela, Llamazares apostó por que'l sistema utilice la contabilidá analítica pa evaluar la so propia xestión y non a los pacientes. “Tán malvando la contabilidá analítica que ye p'ameyorar la xestión y la calidá de los servicios sanitarios, non pa disuadir a los ciudadanos nel usu de los mesmos”.

Respectu al allugamientu de fuerces como'l Partíu Popular, que sollertaron de que la factura podría suponer el preludiu de copagos, Llamazares restó credibilidá, por culpa de que, dixo, fueron elos conservadores quien más s'aplicaron n'implementar esi modelu. “Menta la lluria en casa del aforcáu, pos el principal copagu que se punxo en marcha nos últimos tiempos foi'l copauo farmacéuticu a los pensionistes”. Sía que non, refugó faer xuiciu d'intenciones, eso sí, refugando esa posibilidá.

Pa Gaspar Llamazares el mayor problema del Sistema Asturianu de Salú ye la falta de proyectu: “el Conseyeru de Sanidá vive de les rentes”, criticó'l voceru d'IX pa quien el sistema paróse, lo que, de facto, supon un retrocesu.