Menu

La eurodiputada d'IX Angela Vallina acusó güei a la Comisión Europea d'una total falta de compromisu pa protexer a los refuxaos que fuxen de Llibia y pa garantizar la seguridá de les organizaciones non gubernamentales (ONG’s) que, como l'alemana Misión Lifeline o la española Proactiva Open Arms, operen n'agües internacionales frente a la mariña Llibia.

La europarlamentaria asturiana solicitara'l pasáu mes de setiembre a la Comisión, nun escritu empobináu a la vicepresidenta y Alta Representante de la Unión Europea pa Asuntos Estranxeros y Seguridá Policial, Federica Mogherini, qu'esplicara les midíes puestes en marcha pola UE pa garantizar la seguridá de los ciudadanos europeos y de los refuxaos n'agües internacionales frente a la mariña d'esi país. La entruga realizóse dempués de que la Guardia Costera libia hostigara a un barcu operáu poles dos organizaciones humanitaries so bandera holandesa, nun ataque con disparos y nel qu'entraron pola fuerza nel navío, intentando obligar a la tripulación a la entrega de refuxaos rescataos, daqué contrario de primeres al alcuerdu de non devolución establecíu nel Derechu Internacional, que prohibe la repatriación de persones a países onde esiste riesgu de violaciones graves de los derechos humanos.

Les entrugues d’Angela Vallina pretendíen conocer qué midíes urxentes van emplegase pa garantizar la seguridá de los ciudadanos europeos y de los refuxaos n'agües internacionales; qué midíes pala denuncia y enxuiciamientu de los responsables del abordaxe del citáu barcu holandés; y, finalmente, cuánto dineru apurrió la Unión Europea o qué otros medios dispunxo pa sofitar a la Guardia Costera Llibia.

Mogherini, reprochó Angela Vallina, "refuga la respuesta so subterfugios nos que nin siquier se reconoz el drama humanitariu de los refuxaos, que queden englobados baxu una xenérica y eufemística xestión de los fluxos migratorios o, como muncho, incorporándolos como un elementu más de la migración”, resalvando que l'abandonu d'un país pola guerra nun puede comparase a nengún otru tipu de procesu de expatriación".

La eurodiputada d'IX refugó tamién la falta de respuesta al respective de la falta midíes xudiciales para defendese d'ataques como'l sufiertu pol barcu holandés. "Ye llamentable'l conformismu de Mogherini no tocante a defensa xudicial frente actos como ésti. Nada diz l'Alta Representante Europea para Asuntos Estranxeros y Seguridá Policial de qué midíes van tomase pa denunciar enxuiciar a los responsables de lo qu'a'l nuesu xuiciu ye un actu criminal. Ye impresentable que na so respuesta confórmese diciendo que xueces italianos abrieron delles investigaciones contra presuntos traficantes y persones sospechoses de cometer delitos contra los migrantes y el trabayadores humanitarios. Estimáramos una menor dosis de cinismu y una mayor dosis de crítica y de realidá frente a una Guardia Costera libia que fraya'l derechu internacional, que pon en peligru a trabayadores y trabayadores de les organizaciones non gubernamentales europees qu'operen n'agües internacionales, y qu'escuerren non a simples migrantes sinón a colectivos de persones abelugaes que fuxen d'una situación de guerra".