Menu

L'alcaldesa, María Amor Ardura, presentó nuna asamblea abierta a vecinos y vecines les conclusiones de l'auditoría sobro la nefasta xestión de los anteriores gobiernos municipales qu'empunxeron al Conceyu prácticamente a una situación de bancarrota.

Teberga presentó esta selmana un estudiu económicu financieru sobro la situación municipal, nel que s'analicen les cuentes del Conceyu de 2006 a 2016 y qu'obligaron a un axuste duru de los gastos, énte la difícil situación de les arques municipales consecuencia de la mala xestión de los anteriores gobiernos socialistes. La iniciativa presentala l'Alcaldesa, María Amor Ardura, que yá anunció qu'habrá una segunda parte pa incluyir tamién los años del so mandatu. “Prometimos tresparencia total y bona xestión y esta ye'l meyor forma de faelo realidá”:

Y ye que, señaló la rexidora, dende'l consistoriu pidíase al Principáu que se realizaren dos auditoríes oficiales pero l'Alministración autonómica nun les concedió. Agora, nel estudiu encargáu pol mesmu Conceyu constátase un importante descensu en materia d'ingresos nel presupuestu, lo qu'obliga a faer un axuste de gastos, amontáu en 2016, por culpa de que se tuvo que faer frente a los creitos solicitaos pol Conceyu en 2012.

La presentación d'esta primer parte del estudiu cuntó col sofitu de la dirección d'IX Asturies. Ello ye que hasta na mesma tuvieron el secretariu d'Organización, Alejandro Suárez, y la secretaria de Política Municipal, Gabriela Álvarez, quien destacó "l'exemplu de tresparencia” que supunxo faer públiques les conclusiones de l'auditoría, nuna asamblea abierta a vecinos y vecines.

La gravedá de la situación asina lo aconseyaba, a xuiciu de Gabriela Álvarez, quien señaló que la xestión de los anteriores gobiernos del PSOE empunxo “prácticamente a una bancarrota al conceyu”.

La responsable de Política Municipal quixo destacar lo que denominó “llucha titánica” de l'Alcaldía de Teberga, “tratando d'ufiertar los meyores servicios a los vecinos y vecines del conceyu, entá na situación que'l Conceyu presenta”. El llamentu vien xustificáu poles cuentes: va diez años el conceyu cuntaba con 2 millones d'euros nes cuenta municipales y a día de güei la inversión máxima dexada ye de 19.000 euros.