Menu

Argüelles recuerda que la busca d'alternatives forma parte de los compromisos adquiríos pola FSA

Izquierda Xunida sollertó güei sobro la xestión de los Planes d'Emplegu que, yá a metá del añu, sigue ensin ufiertar respuestes a los Conceyos. El coordinador xeneral de la formación, Ramón Argüelles, compareció esta mañana ante los medios de comunicación, xuntu a Gabriela Álvarez y Juan Ponte –titulares de les secretaríes de Política Municipal y Acción Política- pa esixir una solución y que s'asuman responsabilidaes per parte de l'Alministración rexonal ante la incompetencia de la directora del SEPEPA, Luisa Pérez. Argüelles calificó de “casus belli” la situación y recordó qu'ente los alcuerdos cola FSA pa l'aprobación de los presupuestos incluyóse atopar una salida que nun penalice a los Conceyos.

Al respective de la directora del serviciu d'emplegu, reprochó'l coordinador xeneral d'IX, “la so actitú, la so forma de trabayar foi incompetente”, polo que reclamó responsabilidaes: “daquién tien que tomar midíes”, dixo, ante una situación “insostenible”.

La nefasta xestión de los planes d'emplegu nos postreros supunxo yá unes perdes pa los Conceyos de 10 millones d'euros colos que, enfatizó Argüelles, podríen financiar 100 módulos “Actívate”, qu'algamaríen a 1.000 persones. “Cola que ta cayendo nun tamos pa perder estos recursos”. Y los problemes caltuviéronse anguaño, cuando se perdieron más d'un 60 per cientu d'esti tipu de programes.

Gabriela Álvarez amosó la so medrana a que la falta de respuestes despinte un nuevu varapalu pa los Conceyos, que tán pindios de conocer si, amás, de les indemnizaciones yá pagues tendrán de devolver les subvenciones. Sía que non, la secretaría de Política Municipal d'IX reclamó que se tomen les riendes xurídiques y polítiques que tienen d'incluyir, si fuera necesariu y con rapidez, la puesta en marcha una llínea de compensación a les alministraciones locales.

La situación afecta a tolos Conceyos con independencia de el so color políticu qu'esixe que se pongan midíes yá que, na llínea que van, añedió, nun ye posible que sigan los actuales planes d'empléu. Nesti sentíu, esplicó que dende IX yá se tomó la iniciativa como, ente otros, la propuesta a la Federación Asturiana de Conceyos (FACC) p'afaer los salarios de trabayadores d'esti tipu d'emplegu.

Pela so parte, Juan Ponte amosó la so esmolición porque esta incompetencia pueda suponer, a curtiu o mediu plazu, la privatización de la xestión d'estos planes d'emplegu. Dende IX, preténdese encauzar la situación, pa lo que se van caltener contactos con otros axentes ya instituciones que dexen buscar víes pa la execución d'estos planes con garantíes xurídiques.