Menu

Zapico pide al gobiernu d'Asturies qu'esplique la so posición énte la nueva dilación de les inversiones previstes nel plan de cercaníes y va pidise una actuación d'emerxencia n'anchu métricu

El diputáu Ovidio Zapico denunció güei l'esbarrumbe del sistema ferroviariu n'Asturies con unes cifres que falen por sí soles: “No que va de mes, suprimiéronse 330 servicios de cercaníes y 20 de rexonales”, aseguró'l parllamentariu qu'anunció una batería d'entrugues al Gobiernu. Por que esclarie la so posición énte la incertidume que s'abrió, ademas, polos anuncios del Gobiernu Central de dilatar entá más les inversiones previstes pa la rede asturiana.

Detrás de les falles na prestación o eliminación del serviciu ta, aprofió Zapico, la falta de personal, les averíes nel material o nes instalaciones. “A esta situación d'esbarrumbe, de decadencia, sumóse tamién la noticia que conocíamos va dellos díes, en redol a que'l Ministru Ávalos decidió retardar les inversiones que veníen yá establecíes nel plan de cercaníes p'Asturies, y remites e a la ellaboración d'un plan nacional de cercaníes”.

Zapico señaló qu'IX yá pidió al Executivu asturianu que faiga pública la so opinión sobro esti cambéu na planificación que, aprofió, “dexa nel olvidu'l plan que p'Asturies ellaborara l'anterior Ministru, el señor De la Serna, el ministru viaxeru, aquél que prometía muncho pero cumplía poco, aquél que nos dexó un plan de cercaníes pero ensin creitu pa encaralu”.

IX pide tamién al gobiernu qu'esplique si nun considera necesario esixir una actuación d'emerxencia nel anchu métricu, énte'l deterioru aceleráu del serviciu. “Dende IX sí consideramos esta actuación d'emerxencia”, señaló Zapico pa quien ye imprescindible que'l Gobiernu de Javier Fernández esixa al de Pedro Sánchez qu'evite'l “esbarrumbe del sistema ferroviariu primero que sía tarde“.