Menu

El coordinador xeneral, Ramón Argüelles, anuncia a los vecinos, que presentaron 7.200 firmes al Principáu pa reparar la carretera a La Cubilla, que va llevar el pidimientu a la mesa de negociación presupuestaria

Izquierda Xunida d'Asturies reclamó güei inversiones na carretera de la Cubilla (L.lena), dende Campumanes, coles mires d'ameyorar les comunicaciones del Güerna. El coordinador xeneral de la formación, Ramón Argüelles, comprometese colos vecinos a llevar a la negociación presupuestaria esta reivindicación mientres la movilización que llevó esta mañana a decenes de residentes a Uviéu p’apurrir nel Principáu d'Asturies 7.200 firmes reclamando la meyora d'esta calzada.

Argüelles recordó que parte de los problemes son consecuencia de les obres de construcción de la Variante ferroviaria de Payares, especialmente hasta los túneles, coles consiguientes molesties a los residentes que, amás d'una carretera en mala traza tuvieron que soportar cortes de tráficu y desperfectos y suciedá. “El problema ye qu'hasta los túneles de xemes en cuando iguábase, pero de los túneles escontra riba, tolo que ye la tema de La Cubilla, pos hai unos kilómetros que son realmente bien peligrosos”.

Frente a actuaciones puntuales, Argüelles pidió una actuación más importante. “Como dicimos en L.lena tán entrampando, que ye poner parches. Pero lo que precisa ye una actuación integral y sobremanera dotala tamién de midíes de seguridá porque ye bien fácil que nun puertu d'esos, tan alto, haya muncha borrina y nun momentu dáu la xente puede matase”.

Argüelles aprofió que la obra podría suponer tamién un revulsivu pa esta zona, pudiendo pensase en realizar una etapa de la Vuelta Ciclista daqué que, dixo, “para poner en valor toa esa zona de La Ubiñas que ye preciosa”.

Pela so parte, Auri Villar, presidenta de l'Asociación Gonzalo Castañón, entidá promotora de les movilizaciones, aseguró que tán dispuestos a dar la batalla por que'l Valle del Güerna “esista”, tamién dende la perspectiva de les necesidaes de los sos residentes. “Llevamos unos meses reclamando que nos reparen la carretera la L.lena 8 y contéstasenos que nun ta contempláu en nenguna actuación hasta'l 2030 per parte de la Conseyería, sacantes haya disponibilidad presupuestaria. Y paeznos una tomadura de pelo”.

Énte la falta de compromisu de l'Alministración rexonal, los residentes tán dispuestos a movilizase pa faese oyer, siguiendo xuna campaña de protestes que siga les cortes de carretera como los que yá protagonizaron va selmanes, y tamién cola busca de sofitos más allá de los mesmos vecinos y vecines. Nesti sentíu, les firmes recoyer y apurrir nel Principáu formen parte de la so estratexa pa poner na axenda del Gobiernu Autonómicu les necesidaes del Güerna.