Menu

La eurodiputada d'Izquierda Xunida critica la respuesta qu'ufiertó hasta agora esta instancia europea énte los incumplimientos españoles y esixe “midíes más enérxiques” qu'atayen de forma efectiva esta problemática y que vaigan “muncho más allá de la organización d'un simple taller”.

La eurodiputada d'Izquierda Xunida Ángela Vallina amosó güei el total sofitu del so grupu a les reivindicaciones plantegaes por Ecoloxistes n'Acción por que la Comisión Europea abra un procesu d'infracción a España por violar la Directiva de cálida del Aire. Na so intervención énte la Comisión de Pidimientos del Parlamentu Européu, Vallina defendió que “ten de ser xuna prioridá pa los Estaos y pa la Comisión” combatir los axentes contaminantes nel aire, yá que ye un problema que “acarreta miles de muertes al añu y un grave deterioru del mediu ambiente”.

La eurodiputada d'IX nun despintó la so “esmolición” énte la respuesta qu'ufierta la Comisión Europea y punxo n'evidencia la “enorme contradicción” na qu'incurre “al reconocer que s'incumplen los valores reflexaos na Directiva y, sicasí, nun abrir un procesu d'infracción”.

Les valoraciones d'Ángela Vallina encaxaben dientro del alderique favorecíu na Comisión de Pidimientos pol pidimientu d'Ecoloxistes n'Acción pa encamentar a la Comisión Europea a abrir procedimientos d'infracción contra España non yá por incumplir los valores máximos reflexaos na Directiva de calidá del Aire, sinón pola inesistencia de planes calidable del aire p'atayar esta problemática.

Según datos oldeaos pola Axencia Europea de calidá del Aire cada añu prodúcense siquier 1.600 muertes prematures nel nuesu país por esta causa.

El pidimientu a la Comisión de Pidimientos del Parlamentu Européu presentase tres habese empobinao a la Comisión Europea, en xunetu de 2016, informando del incumplimientu de la Directiva 2008/50/CE relativa a la calidá del aire ambiente y a una atmósfera más llimpia n'Europa. Denunciábase que nuna docena de rexones españoles superase con floxura los niveles d'ozonu troposféricu, de la que nun había planes de calidá del aire pa fae-y frente. La Comisión decidió archivar la quexa n'agostu de 2017, alegando la complexidá pa cumplir colos valores oxetivos.

La Comisión Europea caltien el criteriu de que l'apertura d'un procesu d'infracción ‘nun ye la midida más afayadiza’ y defende centrase en ‘otros elementos contaminantes’ como'l dióxidu de nitróxenu o les partícules en suspensión. Amás, na so respuesta al pidimientu, esbilla una serie de midíes como caltener una comunicación fluyida col Estáu Español o la organización d'un taller.

Ángela Vallina reclamó, frente a esta situación, “midíes más enérxiques” qu'atayen de forma efectiva esta problemática y que vaigan “muncho más allá de la organización d'un simple taller”.

La eurodiputada d'IX propunxo tamién que les instancies europees dirixiéranse a les autoridaes españoles pa riquir “mayor información” sobro esti asuntu y que, al tiempu, demanden “midíes efectives por que se cumpla la normativa europea en materia calidable del aire”.

La Comisión de Pidimientos decidió, finalmente, caltener el pidimientu abiertu y dirixise al Gobiernu Español -en concretu al Ministeriu de Transición Ecolóxica- pa pidi-y más información énte les demandes de los peticionarios. Esta instancia parlamentaria europea anunció tamién que va retomar la cuestión una vegada pronúnciense tantu'l Gobiernu español como la Comisión de Mediu Ambiente, Salú Pública y Seguridá Alimentaria del Parlamentu Européu.