Menu

El coordinador xeneral d'IX enfea al Secretariu d'Estáu'l so prestu col Grupu Español de Crecedera Verde que los sos intereses son los del IBEX35 pero non de trabayadores y territorios afectaos pol cambéu de modelu enerxéticu

IX reprochó güei al secretariu d'Estáu de Mediu Ambiente, Hugo Morán el so silenciu sobro los planes del Gobiernu en materia de transición enerxética. El coordinador xeneral de la formación, Ramón Argüelles, qu'ayeri precisamente coincidió Morán nun actu protocolariu en L.lena, consideró un agraviu p'Asturies y pal movimientu obreru que'l titular de la Secretaría de Mediu Ambiente siga ensin dar la cara ante los representantes de los trabayadores y de los territorios afectaos polos planes de descarbonización nin siquier cuando se dexa ver per Asturies.

Argüelles llamentó que l'axenda de Morán ayeri concluyera tan solo con una visita al despachu del Conseyeru Fernando Lastra pa falar de l’área metropolitana central. “Foi una oportunidá perdida, otra más. Ye llamentable que nun haya reservao nin un solu minutu a cuntar los sos planes y escuchar a los representantes de los sectores y conceyos afectaos pola llamada transición enerxética. Una actitú que casa poco cola necesidá de que la dicha transición sía apautada y xusta. Al contrariu, cada vez paez más claro que ta plantegada pa provocar damnificaos, munchos d'ellos asturianos, ante la mirada impasible d'un ex alcalde mineru al que paez que los territorios de tradición minera y los sos habitantes dexaron d'importa-y”.

El coordinador xeneral d'IX foi bien críticu col Secretariu d'Estáu, al que reprochó esta actitú indolente pa con Asturies, de la que, dixo, amuésase complaciente coles grandes multinacionales que dirixe la oligarquía d'esti país. Y ye que, recordó Argüelles, inda esta selmana Morán reaccionaba encantáu nes sos redes sociales, ante la noticia de que'l Grupu Español de Crecedera Verde considera que'l proyectu de llei de cambéu climáticu y transición enerxética ye una bona propuesta p'aprovechar les oportunidaes económiques d'avanzar escontra una economía descarbonizada". “A pesar de les apariencies, sol paragües de Grupu Español de Crecedera Verde nun tán entidaes implicaes de verdá na protección del mediu ambiente nin tampoco ecoloxistes. Otra manera, trátase d'un lobby de multinacionales, de les que 13 d'elles formen parte del Ibex 35”.

Ramón Argüelles enfeó l’entreguismu d'Hugo Morán a la gran industria mientres paez que nun tien interés n'algamar un consensu por una transición xusta colos representantes de los trabayadores o territorios afectaos. “Bien difícilmente una alianza estratéxica coles principales empreses eléctriques, constructores y entidaes bancaries d'esti país va veni-y bien a los intereses de los trabayadores y quiciabes ello déxenos entender por qué hai esa aventadura en sustituyir una transición enerxética xusta, apautada y equilibrada por planes de lliquidación de sectores estratéxicos que constitúin una agresión p'Asturies”.