Menu

El coordinador xeneral d'IX d'Asturies, Ramón Argüelles fixo güei un llamamientu por que s’algame un alcuerdu que satisfaiga les esixencies del personal de supermercaos, qu'esta mañana protagoniza una protesta frente al SASEC, para esixir la meyora nes sos condiciones socioeconómicas y llaborales.

Argüelles, al pie de les diputaes Marta Pulgar, Concha Masa y los secretarios d'Organización, Alejandro Suárez, Acción Política, Juan Ponte, Política Municipal, Gabriela Alvarez, amás otros miembros orgánicos, aseguró que nos pidimientos son razonables, un sector con un baxu nivel salarial y unes condiciones d'esixencia permanente. "Esperemos que puedan llegar a un alcuerdu y que nun tengan qu'eternizase y que tengan que dir a la fuelga", enfatizó Argüelles quien recordó que'l sector cunta con unos baxos salarios. Nesti sentíu, el coordinador xeneral apostó por una repartida de los beneficios empresariales tamién ente "capital humanu", porque, añedió ye quien ayuda a consiguilos.

En casu de fuelga, anunció'l coordinador d'IX, va animar a la ciudadanía a collaborar pa llograr l'ésitu de los paros. "Nun somos una fuerza sindical pero, ello ye que tamos equí sofitando a CC OO y restu de sindicatos porque creemos qu'esa llucha ye xusta. Que vaigan bien les empreses ye bonu pero si van bien les empreses tienen que dir tamién bien el trabayadores por que'l círculu económicu siga funcinando":

La diputada Marta Pulgar destacó la xusticia de les reivindicaciones y manifestó’l sofitu del grupu parlamentariu a les movilizaciones, que respuenden, dixo, a les consecuencies de la "nefasta" reforma llaboral que, añedió, "dexa a los pies de los caballos un sector especialmente feminizáu".

Izquierda Xunida asumió la necesidá d'un cambéu nes condiciones llaborales del sector de supermercaos y, ello ye que según esplicó la secretaria de Política Municipal, Gabriela Álvarez, la formación ta presentando mociones nos distintos conceyos en sofitu del colectivu y abogando por una meyora de la situación sociolaboral del colectivu.

Esplotación llaboral

El secretariu de Política Municipal, Juan Ponte, denunció la “esplotación llaboral” a la que ta sometida bona parte del personal de los supermercaos, a pesar de la bonanza de les sos resultancies económiques: "ente que les empreses del sector minorista de l'alimentación llogren más de 21 millones d'euros añales de beneficiu netu, los sos trabayadores, en gran parte muyeres, nun lleguen a los 1.000 euros al mes, trabayando 42 hores selmanales. Amás, ensin que sían reconocíes les sos categoríes profesionales. Asina, por poner solo un exemplu, persones que lleven 15 años trabayando de caxeres tienen contratos d'aidar de caxa. Esto tien un nome y ye esplotación llaboral".

Ponte criticó la situación del sector que ta trayendo, dixo, la precarización de la vida de les muyeres que son, enfatizó, les más afectaes por esti tipu d'esplotación.

Los pidimientos de meyores son, a xuiciu de Ponte, xustes, con una esixencia de consecución, gradual, d'un salariu añal qu'algame, siquier, los 14.000 euros en 2020. "Tamién soliciten meyores na estabilidá del emplegu frente al cambéu d'empreses y esternalizaciones, y un plan pal remocicamientu de la plantiya. Tou ello na llínea col alcuerdu estatal de negociación colectiva robláu por CCOO, UXT y CEOE y que la patronal asturiana del sector niégase a cumplir".

Ponte fixo un llamamientu a secundar los paros yá que, dixo, "pa combatir les inxusticies ye necesaria la organización social. Dende IX tol nuesu sofitu a los y les trabayadores".