Menu

El grupu parlamentariu va preguntar en plenu pol cooperativismu forestal, la recuperación de la xornada lectiva de 18 hores y va defender la continuidá de l'área metropolitana

Concha Masa, vocera parlamentaria d'IX na Xunta Xeneral, amosóse esta mañana a favor de buscar consensos pa nomar a los nuevos miembros de la Sindicatura de Cuentes pero con unes condiciones elementales pa consensuar les propuestes, esto ye, que sían persones de reconocíu prestíu, de calter técnicu y non amestaes directamente y solamente a los partíos políticos, según la presencia de muyeres nel mentáu organismu que'l so periodu de vixencia remató.

Per otra parte, y a entrugues de los medios de comunicación, Masa sorrayó que tal como asocedió en Galicia, de la que la manifestación denominada “pola unidá d'España", los ciudadanos na vecina comunidá amosaben la so esmolición pola defensa de la sanidá pública frente a los numberosos retayos que llevó a cabu'l PP. “Lo qu'esmolez a les persones son los servicios públicos, la sanidá, la educación y los servicios sociales y non tantu enarbolar una bandera qu'esmolez muncho menos”, alvirtió la vocera d'IX. Ye una manifestación convocada coles mires de debilitar y camudar al Gobiernu y tien un matiz bien poco beneficiosu pa les negociaciones como pa España polo xeneral, especialmente pa la unidá, “porque más que xunir estes manifestaciones lo que faen ye encrespar y dixebrar a los españoles”, alvirtió la diputada d'IX.

Tocantes a l'actividá parlamentaria, el grupu d'IX na Xunta, va llevar al plenu d'esta selmana una interpelación sobro cooperativismu forestal, una entruga sobro la implantación de la xornada lectiva de 18 hores pal profesoráu de Secundaria, cuidando qu'hai un alcuerdu colos sindicatos y agora, que ye'l momentu de faer la previsión de les plantiyes tien de quedar afitao per parte de l'alministración autonómica. Nesti sentíu Masa, aseguró que l'oxetivu ye afitar un compromisu claru y públicu de que l'alcuerdu va ponese en marcha tal como se subscribió colos sindicatos. Amás, IX va defender xuna moción subsiguiente a interpelación sobro la continuidá de la área metropolitana, encamentando al Gobiernu a que siga adelantre porque se trata de “un proyectu perimportante, urxente y trescendental para Asturies” y asina tener un diagnósticu de la so posición per parte de los partíos políticos sobre la área central.

A lo último, la vocera d'IX, realizó un llamamientu nel Día Internacional de la Muyer y la Neña na Ciencia porque ye necesario inda desenvolver muncho llabor pa les muyeres tengamos un papel importante na ciencia y les neñes percibir d'esa manera.