Menu

El candidatu d'izquierda xunida en Llanera, Gonzalo Bengoa asegura que la formación ye imprescindible pa poner en marcha polítiques de desenvolvimientu nel conceyu

La candidata a la presidencia d'Asturies d'IX, Angela Vallina, apostó esta mañana na feria de San Isidro de Llanera, por midíes que dexen rellanzar l'actividá económica amestada al desenvolvimientu rural, tamién na zona central d'Asturies, onde, dixo, esiste inda capacidá de desenvolvimientu, inclusive a pesar de ser árees eminentemente industriales y de servicios.

Ello ye que la cabeza de llista d'Asturies pola Izquierda a la Xunta Xeneral del Principáu, recordó que “non solamente l'agricultura y el campu ta nes nales, sinón que tamién lo tenemos na zona central y qu'hai que curialo“.

Angela Vallina reconoció que na área central, de forma prioritaria, la industria o los servicios acopen el gruesu de l'actividá económica. Sicasí, esa preeminencia nun debe al so xuiciu significar la perda d'esti sector, tantu por razones económiques como por xestión medioambiental.

La candidata d'Asturies pola Izquierda llegó acompañada del númberu trés de la llista a la Xunta Xeneral del Principáu, María José Miranda, y del candidatu a l'alcaldía de Llanera pola so formación, Gonzalo Bengoa, pa quien l'acción d'IX foi fundamental nesti conceyu.

“IX gobierna en Llanera dos conceyalíes que fueron clave por que Llanera meyorara; les obres, por casu la rede de caminos, que se fixeron nestos cuatro años fueron xestión d'IX”, defendió Bengoa.

El candidatu local reclamó polítiques actives pa rellanzar el mediu rural, nes que tienen d'incluyise cuestiones d'infraestructures básiques como'l saneamientu. “Yo creo qu'el qu'IX lidere'l próximu gobiernu va a ser posible p'apostar per un mediu rural, non solamente n'actos puntuales, como pue ser esti (en referencia a la feria de San Isidro), sinón tol añu con midíes concretes.

Nes semeyes, Maria Jose Miranda, Ruth Rodriguez Fernandez, Angela Vallina y Gonzalo Bengoa