Menu

La cabeza de llista d'IX alvierte de que se ta desmantelando'l sector tecnolóxicu en cuenta de apostar por él

Ángela Vallina, cabeza de llista d'Asturies pola Izquierda y Ovidio Zapico, númberu dos, caltuvieron esta mañana un alcuentru col comité d'empresa de Telecable, nel que los trabayadores manifestaron que dende la so pertenencia a Euskaltel n'Asturies perdióse un 10% de los emplegos netos de la compañía, cifra que s'alza con externalizaciones y marches incentivaes hasta un 23%. Los trabayadores tamién punxeron de relieve la incertidume sobro'l so futuru al desconocer el modelu de negociu que pretende llevar a cabu nos próximos meses, cuando se materialice la fusión por absorción pola gallega R y énte l'aumentu del porcentaxe accionarial del grupu de capital riesgu, Zegona. D'un total de 182 empleos directos en 2017, Telecable pasó a tener 142, nuna continua pinga de baxes.

Vallina alvierte de que n'Asturies se ta desmantelando'l sector tecnolóxicu en cuenta de apostar por ello atrayendo nueves empreses. Ta produciéndose xuna continuu perda d'empreses y deslocalizaciones ensin que'l presidente del Principáu nin el candidatu de la FSA dixeren nada, demandó la candidata d'Asturies pola Izquierda. Vallina alvirtió que son munchos los puestos de trabayu nel aire, nuna empresa que foi fundamental n'Asturies, que cuntó con importante inversión pública y agora va tener una nueva deslocalización. "¿Cuándo'l gobiernu socialista va entrar a solucionar los problemes d'Asturies?", pregúntase la candidata d'IX. Vallina fixo fincapié en que se ta falando de puestos de trabayu tecnolóxicos, bien importantes pal futuru d'Asturies. Tamién llamentó que Pedro Sánchez venga a Asturies a animar a Adrián Barbón a “rematar la xera” y preguntóse si esi remate de la xera representa la estocada final pa la comunidá autónoma.

El voceru del comité d'empresa, sorrayó la incertidume na que s'atopa la plantiya de Telecable y tamién los 700 que conformen l'empléu indirectu que xenera. Los trabayadores de Telecable sostienen que son “la hermana probe” del grupu y que, al curtiu plazu, Telecable va pasar de ser una empresa piquera na investigación y el desenvolvimientu, con un equipu nuevu ya implicáu, a quedar amenorgada a una “tiendona” n'Asturies, “balera de conteníu”, con un centru de decisión que yá nun va tar n'Asturies. “Solo va quedar la marca y un batallón de subcontrataos precarios”, incidió otros de los miembros del comité, perdiendo asina coles externalizaciones el verdaderu talentu que tenía la empresa, dexando de ser xuna empresa tecnolóxica, con muncha inversión n'I+D+I y cercana al veceru. Los trabayadores tamién llamentaron que'l Gobiernu asturianu “nunca fixo nada” y dende la salida de Cajastur, “Telecable empezó a dir al debalu”, como esplicó'l so voceru.