Menu

Ovidio Zapico alvierte que la baxa tasa de recicláu, frutu en parte de la "ofuscación" del PSOE cola macro-incineradora, puede acarretar sanciones de la UE

Izquierda Xunida va llevar al próximu Plenu de la Xunta Xeneral del Principáu una Proposición non de Llei (PNL) pa encamentar al Gobiernu d'Asturies a que ponga en marcha un auténticu plan de choque que dexe aumentar el reciclaxe de les borrafes y resolver el retrasu de la Comunidá na materia. El diputáu Ovidio Zapico sollertó que l'escasa tasa de reciclaxe puede acarretar sanciones yá que nun se cumplen les esixencies de la Unión Europea al respeutu. Ello ye que afirmó'l parllamentariu, pes a la medría nel últimu exerciciu, en 2020 nun se va algamar el ratio del 50% qu'establez la Unión Europea de borrafes reciclaes: "tamos casi a 28 puntos del oxetivu. Cola crecedera, tomando como media la crecedera del añu pasáu pa estos próximos años, tampoco vamos llegar a algamar les esixencies comuñales pa 2025, que se cifren yá nel 55%".

Pa Zapico, les situación actual ye una consecuencia más de "la ofuscación" mientres toos estos años del PSOE, qu'apostó pola fallida macro-incineradora como única solución a la xestión de les borrafes n'Asturies y nun buscó polítiques ambicioses en materia de reciclaje.

Énte la falta de midíes reales que dexen ameyorar y aumentar el reciclaxe, IX apuesta por un plan de choque qu'impulse d'una vegada y con fuerza les polítiques de borrafes n'Asturies. Pa ello, la formación plantega una Proposición con cuatro exes: Medría de tases de reciclaxe orgánicu; penalizar de manera pecuniaria a productores de basura que nun se comprometan cola separación n'orixe; exemplaridá de la mesma alministración tocantes a la xestión de les sos borrafes; y un cambéu de mentalidá sobro les borrafes que tienen que dexar de vese como un problema para convertise en recursos útiles.

La baxa consecución d'oxetivos en reciclaje nun almite, a xuiciu del parllamentariu, esviar responsabilidaes. "Queremos alvertir daqué, porque sabemos que lo vamos a oyer estos díes: la competencia nun ye municipal; el Principáu preside y dirixe COGERSA, l'organismu encargáu de la xestión de la totalidá de les borrafes de los conceyos asturianos y, amás, ye'l responsable de los planes de borrafes y tamién de la cooperación local".

Ovidio Zapico esixó al Gobiernu del Principáu "ambición y lideralgu políticu" p’asitiar Asturies entre la Comunidaes Autónomes destacaes nel desenvolvimientu d'eses polítiques yá que, enfatizó, "inciden nuna meyor calidá ambiental y tamién na salú de la nuesa xente".