Menu

Ángela Vallina refuga la iniciativa del PP de baxar l’IVA al entender que ye inoportuno y nun sirve pa un desenvolvimientu del sector y apueste por más I+D+i con polítiques que favorezan tol procesu p’aprovechar el potencial silvícola d'Asturies

Izquierda Xunida propunxo güei una nueva política forestal n'Asturies coles mires de fomentar la esplotación de la biomasa dende l'orixe hasta'l final de la cadena. La vocera de la formación, Ángela Vallina, aprovechó la so fixación de posición pa refugar una propuesta del PP p’amenorgar l'Impuestu sobro'l Valor Añedíu (IVA) a la biomasa, que s'aldericó na Comisión d'Industria, al entender que'l desenvolvimientu d'esti sector nun tien de realizase per esta vía. Frente al amenorgamientu d'impuestos, más nun momentu de necesidaes especiales na recaldación pa dar respuestes a los retos de la crisis global xenerada pola COVID-19, Vallina propunxo un xiru pal desenvolvimientu d'un modelu integral.

Les polítiques de fomentu, enfatizó la parllamentaria, tendríen d'incluyir toles actividaes forestales: "nesti asuntu ta casi too por faer, ye necesario que'l Gobiernu solmene la inercia del vieyu ICONA nes polítiques forestales que se desenvuelven porque nun son eficientes. Sicasí, aportunamos, una reordenación de les polítiques de gastu en materia de forestal, una medría a los programes d'Investigación, Desenvolvimientu ya innovación (I+D+i), en materia d'aprovechamientu enerxéticu de la biomasa, y una apuesta poles iniciatives de xeneración eléctrica d'esta fonte d'anovables, son muncho más efectives y eficaces que xuna simple amenorgamientu del impuestu del IVA".

Ángela Vallina reconoció la necesidá d'impulsar el desenvolvimientu de la biomasa n'Asturies como "fonte enerxética alternativa, anovable y medioambientalmente sostenible" más porque, enfatizó, "Asturies tien una masa forestal y una potencialidá silvícola que puede y tien d'aprovechase. Pero, mire, les polítiques de fomentu bien entendíes fainse dende'l gastu, non dende l'ingresu y, amás, eses polítiques de fomentu tienen qu'estendese, por que sían útiles, de primeres, a tola cadena de xeneración d'enerxía per biomasa, qu'inclúi nel so entamu les actividaes yá de cultivu forestal, amás d'otres bien necesaries como son les que tienen que ver cola meyora de les infraestructures forestales, lo que redundaría nel amenorgamientu de los costos de producción y tendría un impactu económicu más favorable".

La vocera d'IX refugó la proposición del PP al entender que nun sirve realmente pal fomentu del sector de la biomasa y ser, amás, inoportuna nuna situación como l'actual. "Pretenden baxar los impuestos, cola que ta cayendo y coles necesidaes de financiamientu de los servicios públicos esenciales qu'agora esisten y que paez poco acertao nestos momentos", esplicó.