Menu

El diputáu apuesta por una “cultura del alcuerdu", abierta a los sindicatos de clase, coles mires de reforzase pa encetar reformes y cambeos necesarios.

El diputáu y coordinador xeneral d’IX Asturies, Ovidio Zapico, reclamó güei a la conseyera de Derechos Sociales y Bienestar, Melania Álvarez, abrir un marcu de cooperación que sirva pa evitar conflictos como'l del centru San Agustín de Xixón. El parllamentariu defendió la necesidá d'algamar consensos y pactos con otres fuerces polítiques: "cualquier reforma qu'usté pretenda faer, que pretenda impulsar, que cualquier aforru que pueda realizase na Conseyería, como yera rebaxar d'esti arriendu, usté sería más fuerte si apautara primeramente con grupos parlamentarios que puea tener ideolóxicamente más cercanos, y, amás, dalgún como'l nuesu que polo que ye la mochila, esa mochila que con arguyu cargamos, tenemos cierta conocencia nesta materia, nesta Conseyería, nesa Dirección Xeneral y n'ese Centro Social en concretu".

El pactu, esplicó'l parllamentariu, yá demostró en materia de bienestar social resultancies. "Con VIPASA empecipiábamos una sienda. Y resolvimos yá unos cuantos casos nesi marcu de cooperación qu'establecimos en redol a VIPASA y la Dirección Xeneral de Vivienda. ¿Por qué nun faer estensivu esi marcu de cooperación a otros asuntos, non? Bríndo-y esa posibilidá porque, a última hora, yo lo que quiero, señora Conseyera, ye que s'eviten conflictos que, amás, son innecesarios como se demostró col Centru de San Agustín: tanto de meses perdíos pa con un poco d'aforru llegar a la mesma posición; aforru que, posiblemente, nuna situación apautada y de fuerza usté podría consiguir un aforru significativamente superior".

Ovidio Zapico enfatizó en que la Conseyera Melania Álvarez tien de buscar los pactos yá que-y va redundar en más fortaleza de cara a cualquier reforma. Amás, el coordinador xeneral d'IX pidió que "faiga estensivu" esa cultura del pactu nel marcu xeneral del departamentu a los sindicatos de clase.

Sía que non, el diputáu alvirtió de que va tar "vixilante" a que’l 1 de setiembre'l centru y les sos actividaes reábranse. Zapico reconoció la importancia de protexer al conxuntu de la ciudadanía asturiana y, especialmente, a aquelles persones qu'ante'l virus yeren más vulnerables como yeren les persones mayores. Sicasí, reivindicó la necesidá de garantizar a esti grupu poblacional una "vida social plena" que, al so xuiciu, tien de considerase inversión y tamién aforru, inclusive sanitariu: "esa calidá de vida, esi sentise útiles, esi faer actividaes, esi lleer periódicos, esi axuntase con otres persones de la so mesma edá y condición, a última hora, esa vida que día ente día desenvolvíen nesi centru social ensin dulda redunda tamién nun beneficiu pal so salú y nun aforru polo tanto pal SESPA. Nun veamos solamente, cuando se fala de númberos en cuestión de derechos sociales en daqué como un gastu, que nun lo ye, que nunca lo ye, que ye una inversión y que puede como-y toi diciendo suponer aforru n'otres partíes de los presupuestos d'Asturies".