Menu

Zapico defende que les instalaciones nun sían un meru apeaderu pa convertise en puntu d'enllaz pa viaxeros que nun tienen salida o llegada n'Uviéu o Xixón

Izquierda Xunida reclamó güei que La Pola L.lena se convierta na puerta d'entrada y salida de los trenes d'altes prestaciones, una vegada entre en serviciu la variante ferroviaria de Payares. El diputáu y coordinador xeneral de la formación, Ovidio Zapico, reclamó que se prevea esta situación de forma que s'aproveche la estación nesa localidá por que nun sía un simple apeaderu. En dellos casos, señaló, esa estación puede convertise na preferente pa viaxeros que nun van nin a Uviéu nin a Xixón. "Nun podemos esbardiar esa oportunidá”.

Pa Zapico, hai que prever el nuevu modelu de comunicaciones que va suponer l'entamu de los servicios d'alta velocidá, de forma que s'aprovechen tolos recursos. El diputáu aseguró que pa la población que tenga qu'utilizar el serviciu ferroviariu procedente, por casu, de les cuenques, tien más lóxica habilitar La Pola L.lena como estación qu'obliga a que se vaiga a Uviéu pa depués siguir por aciu cercaníes.

Zapico consideró afayadizu que los trenes d'alta velocidá, d'exes adaptables ente les víes d'anchu ibéricu y européu, lleguen a Uviéu y Xixón yá a velocidaes convencionales. Sicasí, dixo, La Pola L.lena tien de tener el so propiu papel que nun puede esbardiase. Nesti sentíu, reclamó inversiones pa modernizar una estación que data del sieglu XIX y con problemes d'accesibilidá que deben de ser resueltos por que, tamién, pueda ser usada como puntu d'enllaz pa los trenes d'altes prestaciones.