Menu

José Luis Trabanco, satisfechu por una intervención que va ameyorar la seguridá del centru y va dar respuesta a los problemes derivaos del deficiente cableaxe

El presupuestu d'Asturies pa 2023 va incluyir nel so capítulu d'inversiones el proyectu de reforma de la instalación eléctrica del colexu Virxe del Fresnu, de Grau. Izquierda Xunida axustó la incorporación d'estes obres coles que pretende resolver los graves problemes de seguridá del actual cableaxe, que data de los años 60 y que nin siquier ye capaz de satisfaer la demanda de los equipos informáticos nin, muncho menos, el de los electrodomésticos de cocines qu'esixen una mayor potencia de serviciu.

El Conceyu de Grau llevaba años demandando una reforma total d'esta instalación, por culpa de que los cambeos nesta rede interna riquíen d'una intervención integral y non de meros cambeos que pudieren incluyise nos trabayos habituales de caltenimientu realizaos de forma permanente pol mesmu consistoriu.

L'alcalde moscón, José Luis Trabanco, amosó güei el so prestu énte'l compromisu d'intervención nesti centru educativu. "Trabayemos enforma, tantu dende l'Equipu de Gobiernu como dende'l Grupu Parlamentariu d'IX por que se atendiera a esta inversión. Nun ye un caprichu, sinón una intervención necesaria. El Conceyu fai llabores de caltenimientu, pero esti tipu d'obres ye competencia del Principáu d'Asturies. Cola inversión nel presupuestu de recursos pa poder modernizar la instalación del Colexu damos respuesta a un problema que tenía consecuencies nel normal funcionamientu d'esti centru y d'una vegada vase a solucionar un problema que lleva bien de años enquistado".