Menu

Alejandro Suárez pide "prudencia" al presidente d'OTEA, al qu'encamienta aplicase en llograr un nuevu conveniu pal sector, y califica de "inadmitible" la presión que pretende exercer sobro los responsables públicos

Izquierda Xunida va utilizar tolos recursos al so algame pa garantizar la protección del cascu históricu uvieín frente a usos abusivos de los espacios públicos. En conociendo dos informes de Cultura que vienen llindar la instalación de terraces nestes zones, frente a les pretensiones de la patronal hostelera, OTEA, y del propiu Conceyu, que se plegó a estes presiones, el voceru de la formación n'Uviéu, Alejandro Suárez, anunció que va esixir el cumplimientu íntegru" de les directrices marcaes pola Conseyería de Cultura y alvirtió que, si nun se cumple, "vamos allegar a los servicios d'inspección del Principáu o a la mesma Fiscalía. Lo que nun nos paez afayadizo ye qu'una entidá empresarial prime d'esta manera a los responsables públicos y que los responsables públicos déxense primir. Paeznos inadmitible".

Suárez aportunó en que l'espaciu públicu nun ye tan solo pa ganar dineru: "ta pa protexer los bienes que toos tenemos y a los que tenemos derechu a esfrutar, yá sían ambientales o culturales, como ye'l casu". Nesta situación, el voceru de IU Uviéu pidió "prudencia" al presidente d'OTEA, de la que-y encamentó poner tolos esfuerzos en tener un sector con conveniu colectivu y dignu d'una democracia, sobremanera, enfatizando, "que dexe de primir a los responsables públicos. Ta bien acostumáu a esto y dende IX dicímos-y que gústennos enforma les comisiones". Eso sí, precisó que'l tipu de comisiones que defende la formación son les comisiones d'investigación, les comisiones de cultura, les comisiones de patrimoniu cultural, y vamos exercer nelles toa la nuesa fuerza político pa protexer lo qu'entendemos que son los bienes de toos, que nun tán pa ser privatizaos.

Los informes

Tocantes a los informes, el primeru de la Comisión de Patrimoniu recuerda la obligación de protección y el caltenimientu d'un Conxuntu Históricu o d'un bien protexíu, y añede: “Con éses, una vegada sentáu esti principiu, puede establecese como primer criteriu que rixe l'usu del espaciu públicu del Conxuntu Históricu, o de la redolada d'un bien protexíu, la necesaria prioridá del usu xeneral sobro l'usu especial, principiu consustancial al conceutu de Patrimoniu Cultural".

Esta prioridá del usu xeneral ye la que marca les condiciones de calter técnicu qu'el CPCA vieno estableciendo pa la instalación de terraces d'hostelería n'espacios públicos sometíos a protección per razón del Patrimoniu Cultural. Les mesmes fueron asumíes na Ordenanza reguladora de la instalación de terraces d'hostelería na vía pública, aprobada pol Plenu del Conceyu d'Uviéu en sesión del día 28 de xineru de 2015, modificada en sesión del día 22 d'avientu de 2016.

Nel so segundu informe, la Comisión de Patrimoniu establez nel so informe dos considerancies importantes respectu de la Ordenanza de Terraces primeramente aprobaes. La primera fai referencia a la división en dos zones distintes de la delimitación de la redolada de protección de la Cámara Santa y del restu de los Bienes d'Interés Cultural declaraos nel cascu históricu de la ciudá d'Uviéu. Según Patrimoniu: “Esta propuesta crea inseguridá y desigualdá de tratu pa quien tán afectaos pola mesma protección xurídica.

Amás, abriríase una posibilidá d'autorización per parte d'esta Conseyería, que namái podría resolvese con un dictame desfavorable.” Por ello revisa l'alcuerdu anterior ya informa “desfavorablemente la creación de zones o ámbitos nuevos, ensin fundamentu nos ámbitos delimitaos nos decretos de protección, proponiendo que se caltenga la redacción anterior de los artículos 1.3, 7 y 20 de la ordenanza vixente”.

La segunda fai referencia a la prohibición de los toldos pórticos (sombrielles de más de trés metros de diámetru, que l'informe de la Comisión de Patrimoniu considera de calter permanente, frente al criteriu del conceyu y OTEA, y, poro, non autorizables na zona de protección BIC. Por ello establez que: “Poro, van esaniciase la referencies a toldos-pórticos qu'afecten a los ámbitos definíos nel artículu 1.3 de la ordenanza vixente”.