Menu

IX sumóse güei a les movilizaciones contra la proliferación de parques eólicos que de forma desafranada pueden poner en riesgu'l futuru del mediu rural asturianu

El diputáu y coordinador xeneral d'Izquierda Xunida d'Asturies, Ovidio Zapico, pidió güei al Gobiernu d'Asturies que "pare, piense y planie" un modelu d'ordenación pa los futuros parques eólicos. El parllamentariu, al pie de la vocera na Xunta Xeneral, Ángela Vallina, sumáronse güei a les movilizaciones convocaes, dende les Plataformes Xente d'Ozcos-Eo, Xente de Noroccidente y Plataforma Entorno Picu Cubel, en Taramundi, L.luarca y Pravia, contra la espansión desafranada de molinos de vientu.

Na capital de Valdés, el diputáu y coordinador xeneral de la formación, Ovidio Zapico, aportunó na necesidá d'una planificación que dexe una crecedera ordenao y sostenible d'esti tipu d'instalaciones por que, enfatizó, nun topeten col indispensable desenvolvimientu local, col caltenimientu de les actividaes tradicionales, pero, tamién, con otros sectores en puxanza como'l del turismu ecolóxicu. Zapico recordó qu'IX Asturies lleva yá dos años denunciando la falta de planificación. El tiempu, aseguró, "ta dándonos la razón: hai un auténticu boom na nuesa comunidá autónoma, qu'hai ausencia total de planificación en redol a estes enerxíes anovables, y qu'hai un descontentu social cada vez mayor y bona amuesa son estes concentraciones qu'en distintos puntos d'Asturies hubo güei".

El coordinador xeneral d'IX volvió faer "una llamada más" al Gobiernu d'Asturies pa llograr una transición enerxética xusta daqué que, llamentó, en munches ocasiones nun se se consiguió: "nun foi xusta cola clase trabayadora, nun foi xusta con munchos territorios de les cuenques mineres y nun ta siendo xusta agora tampoco col mediu rural, con esta proliferación de parques eólicos qu'estropien actividaes tradicionales, qu'estropien l'ecosistema, que ponen en riesgu, por casu, tamién la ganadería".

Ángela Vallina, sumase a la concentración de Pravia, al pie de miembros de la organización local y el coordnador del grupu parlamentariu, Jorge Pardo.