Menu

Ovidio Zapico, que sofitó la presentación de la llista, amosóse convencíu de que la candidatura, de mayoría femenina y con cares nueves, va ser decisiva pa caltener el Gobiernu municipal

Ana Díaz volverá encabezar la llista d'IX a la Alcaldia de Riosa, coles mires de revalidar la so victoria pa dirixir, de 2023 a 2027 el Conceyu. Va facelo con una candidatura de mayoría femenina y na que se combina mocedá y esperiencia.

Pa l'actual rexidora, la llista ellaborada nesta cita electoral va ser decisiva pa collechar los meyores resultaos: “yo creo que tenemos una candidatura pa ganar; toi bien contenta pola xente que nos acompaña, porque tenemos la esperiencia y tamién la mocedá. Tenemos bien de muyeres y eso faime tar bien arguyosa, de que la xente en Riosa quiera incorporase al nuesu equipu de trabayu”.

Sía que non, aseguró Ana Díaz, per delantre queda munchu llabor por presentar. “Vamos tar bien seles col trabayu realizáu y, tamién, con munchos proyectos enriba de la mesa”.

La presentación de la candidatura cuntó cola presencia y el sofitu del coordinador xeneral y candidatu d'IX a la Presidencia d'Asturies, Ovidio Zapico, pa quien la llista demuestra que l'alternativa de la formación ye “un proyectu bien curiosu, un proyectu qu'ilusiona, con xente bien nuevo, con munches muyeres; quiciabes son los dos grandes déficits d'una organización política cuando se faen candidatures nel mundu rural: atopar xente nuevo, atopar muyeres, y equí hai les dos coses. Poro, yo creo qu'esto demuestra qu'en Riosa se tán faciendo perbién les coses, qu'Ana lleva ocho años xestionando perbién, xuntu col so equipu esti conceyu”.

Ello ye que esi bon faer, esplicó Zapico, va ser decisivu pa “reeditar la tercer victoria consecutiva nes elecciones de mayu”.

Al pie de ella, componen la llista Juan Carlos Álvarez Rodriguez, Cecilia Fernández, Fernández, Melissa Cebrián Toral, Sonsoles Alonso Armes, Laura González Mallada, José Manuel Garcia Argüelles, Domingo González Galindo y Nerea Álvarez Muñiz.